www.zomidc.org                                                  Motto "Zomi sungah Innkuan Khat i hi hi ".                               Estd : 2001

   Tuesday, 18. August 2009 05:40 PM -0400

              Photo: Zomi Innkuan D.C group, 2003 Zomi Namni

Zomi Innkuan i cih bang hiam?           

        Innkuan (family) sungah aom family member te in khat leh khat ki it ki ngai in na sem khawm diam diam a, nop na dahna aom ciang kinop pih kidah pih uh hi. Innkuan sung ki it kilem zawh ciang, i minam aading na kisem thei pan a, a masa pen in i innkuan sung teng i nop sak masak ding kisam masa pen hi. Tua tawh ki bangin Washington D.C kiim aom Zomite pen innkuan khat sung i hih mah bangin nopna dahna ah kihuh diamdiam ding leh khat leh khat itna khang semsem in i minam aading nasep khop theih ding ngimna tawh Zomi Innkuan D.C kipawlna a kiphuankhia a hi hi. Tuaciang in Innkuan i cih in "Community" i cih tawh kibang a, mikang lai in "Zomi Community, D.C " zong kici thei hi.

Zomi Innkuan D.C kipat khiatna         

           Pasian hong makaihna tawh USA Zomi Innkuan D.C hong piankhiat zawh kum 4 sung hong lut ta hi. Zomi Innkuan D.C hong piankhiatna en kik leng, Zomite USA gam i tun zawh a sau vei hangin I nam sungah dahna nopna kiuap nading kipawlna kician kum 2000 ciang kinei nai lo hi. A diak diak in Washington D.C area ah Zomi min tawh kipawlna khat neih ciat dingin lunggulhna kinei tek hi. Kawlgam leh gam tuamtuam pan Zomite Washington D.C area hong zawn ciat uh a, Zomite hong tam tektek hi. 2001 kum sungin, Zomi sung pan makai pawl khat te in Zomi min tawh kipawl khopna neih ding thu kikupna kinei to to a, kipawlna neih ding ki thu kim tek hi.
             2001 November kha 17 ni in Pa Thang Lian Pau(Zo Taang Innpi) ah Khuadopawi leh Zomi Khawmpi kibawl a, tualai ah hong kihel Zomibup thu kimna tawh "Zomi Innkuan Washington D.C" kiphuankhia in panmun sehna kinei hi.
            Zomi Innkuan D.C kiphuh kum panmun len makaite a nuai a bang a hi hi.
Chairman - Pu Dr. Vum Son
Vice Chairman - Pu Kham Go Pau
Secretary - Pu Ngo CinThawng
Asst. Secy. - Pu Thang Lian Pau
Treausurer - Pu Khai Khan Dal(Dal San)
                     - Tg. Thang Khan Tuang
Auditor      - Tg. Tawng Cin Khai
                   - Pa Nang Sian Thang
Excutive members - Thomas On Sian Mung(Youth Dept.)
                           - Pa Pau Za Lian (Biakna lam)
                           - Pa Thang Khan Piang(Biakna lam)
            Zomi Innkuan D.C makaihna tawh kikhop kha khat, khat vei neih ding thu kimna aom mah bangin tu ni ciang dong kikhopna kizom suak hi. Kum sim in Zo ngeina khuadopawi zong nuam takin kibawl suak thei hi. Zomi Innkuan D.C member pih khat ii innkuan sungah dahna a tun ciang leh zato hong lup ciangin Zomi Innkuan D.C in huhna sum ciantan in kipia hi.
                   2003 kum in Yangon Zomi Momno Kipawlna pan Tansawm ah Distinction ngah te pahtawina piak nadingin Zomi Innkuan D.C in sponsor kipia thei hi. 2003 kum sung mah in Zomi Innkuan D.C makaite leh CNF pan makaite kiho limna nih vei kinei a, kiholimna tungtawn in CNF te in Zogam sungah a tatsiatna te hong khawl pah uh a, tuciang dong hong kawlsuak uh hi.
            Tua bek tham loin kum sim Zomi(Chinbup) makaihna tawh a kibawl den Zomi namni ah Zomi Innkuan D.C in Zongeina lam tuamtuam leh Fashion show lahna kinei thei den bek tham loin Zomi D.C lasa siamte in kum sim in Zongeina la sakna tawh zong kihel thei den hi. 2005 kum January 1 ni in Dr. Vum Son inn ah Zomi Innkuan D.C khawmpi leh kum thak dawnna kinei ah tualai ah 2005 kum ai ding panmun kisehna leh mailam hun kalsuanzia ding thu kikupna kinei thei hi. Zomi Innkuan D.C ii thu meilet(By-law) zong ngelh ding kiken sat hi.
                  2005, March kha 26 ni in Florida Zomi Innkuan makaihna tawh USA gambup Zomi khawmpi kinei a, Zomi Innkuan tuamtuam pan delegate te tampi kah thei in "Zomi Innkuan (USA)" phuankhia hi. Zomi Innkuan D.C pan delegate(palai) ding in Chairman pa Pa Ngo Cin Thawng leh Tg. Thomas On Sian Mungte va kihel thei uh hi.
 

Photo: Zomi Innkuan D.C Khuadopawi, 2004

Copy Right  ® 2005-2007. All rights reserved.
Published by Zomi Innkuan Washington D.C, USA

webmaster@zomidc.org